Bangsarnir hennar Söllu á bókasafninu hér í Holtaskóla fréttu af bangsaveiðum barna hér í Reykjanesbæ frá bangsavini sínum hjá Lögreglunni á Suðurnesjum. Þeir tóku því fljótt til sinna ráða og hafa komið sér fyrir í gluggum skólans og vonast eftir að sjá sem flest börn á ferli. Holtaskólabangsarnir vilja hvetja alla bangsa í bænum til að koma sér fyrir í gluggum fyrirtækja, stofnanna, heimila og styðja í leið við þetta skemmtilega samfélagsverkefni.

Þessa vikuna hefur skólahald verið með talsvert öðru hætti en nemendur, foreldrar og starfsfólk er vant. Fyrsta vika frá því að samkomubann var sett á er liðin og gekk skólastarf almennt vel fyrir sig. Nemendur í 1.-6. bekk hafa mætt annan hvorn dag í skólann og sinnt sínum verkefnum af miklum myndarbrag. Nemendur í 7.-10. bekk sinna sínu námi með aðstoð tækninnar og eru í sambandi við sína kennara rafrænt.

Í ljósi aðstæðna hefur verið ákveðið að fresta skerta deginum sem vera átti föstudaginn 20. mars fram á vorið.

Áríðandi tilkynning - Starfsdagur mánudaginn 16. mars Í ljósi fyrirmæla heilbrigðisyfirvalda sem gefin voru út fyrr í dag verður starfsdagur í grunnskólum Reykjanesbæjar mánudaginn 16. mars. Starfsdagurinn verður nýttur í að undirbúa og skipuleggja skólastarf á því tímabili sem takmörkunin nær til. Því fellur skólastarf niður og frístundaheimilið verður lokað.

Stærðfræðikeppni grunnskólanema fór fram í FS 27. febrúar síðastliðinn. Þátttakendur voru alls 112 úr níu grunnskólum á Suðurnesjum. Í gær fór fram verðlaunaafhending eftir keppnina og fengu fimm nemendur Holtaskóla verðlaun.

Í gær fór fram lokahátíð Stóru upplestrarkeppninnar í Reykjanesbæ. Tólf nemendur voru fulltrúar sex skóla að þessu sinni. Áhorfendur fengu að njóta vandaðs og vel æfðs upplesturs og augljóst að mikil vinna og metnaðar lá að baki frammistöðu nemenda.

Lífshlaupið er haldið árlega og er markmið þess að hvetja landsmenn til að huga að daglegri hreyfingu sinni og auka hana eins og kostur er. Í ráðleggingum Embættis landlæknis um hreyfingu er börnum og unglingum ráðlagt að hreyfa sig í minnst 60 mínútur á dag og fullorðnum í minnst 30 mínútur á dag. Starfsmenn Holtaskóla hafa tekið þátt í keppninni á hverjum ári með góðum árangri enda metnaðarfullt og kraftmikið starfsfólk í Holtaskóla. Í ár var keppnin hörð og mjótt á mununum. Starfsmenn skólans urðu í 2. sæti í flokki þeirra vinnustaða með 30-69 starfsmenn og fengu silfrið fyrir bæði fjölda daga og fjölda mínútna. Þeir Axel Ingi Auðunsson og Þorbergur Jónsson fóru og veittu verðlaunum viðtöku fyrir hönd skólans. Við erum afar stolt af okkar fólkiog óskum öllu starfsfólki skólans til hamingju!

Í morgun var haldin skólakeppni Stóru upplestrarkeppninnar hér í Holtaskóla. Tíu nemendur úr 7. bekk kepptu til úrslita og stóðu tveir þeirra uppi sem sigurvegarar og munu keppa fyrir hönd skólans í Bergi, Hljómahöll þann 11. mars. Allir nemendur sem kepptu til úrslita hafa lagt mikla vinnu og elju í undirbúning og sást það glögglega á öruggum og hljómgóðum upplestri. Þær Guðbjörg Rut Þórisdóttir, Hrafnhildur Hilmarsdóttir og Guðlaug María Lewis voru dómarar. Hörð keppni var á milli nemenda og starf dómara vandasamt. Á meðan dómarar sinntu sínum störfum spilaði Eva Kristín Karlsdóttir á píanó. Að lokum stóðu þau Margrét Júlía Jóhannsdóttir og Kári Kjartansson í 7. VR uppi sem sigurvegarar. Við óskum þeim innilega til hamingju með sigurinn og hlökkum til að fylgjast með þeim keppa fyrir hönd skólans þegar skólar í Reykjanesbæ mætast í mars.

Það er óhætt að segja að gleðin hafi verið við völd á öskudaginn hér í Holtaskóla. Allskyns kynja- og furðuverur voru á ferli og gaman að sjá hugmyndaflug nemenda þegar kom að búningavali og -hönnun. Unglingastigið skemmti sér við að keppa í "minute to win it" þrautum, og mið- og yngsta stig skemmtu sér á fjölbreyttum og áhugaverðum stöðvum. Skóladagurinn endaði á því að veitt voru verðlaun á mið- og elsta stigi m.a. fyrir flottasta hópinn, tvíeykið, búninginn, frumlegasta búninginn, krúttlegasta búninginn svo eitthvað sem talið upp.